O proxecto súmase aos traballos xa aprobados para a humanización e reurbanización de Severo Ochoa, outra das arterias do polígono de Agrela
A Concellaría de Urbanismo, Vivenda, Infraestruturas e Mobilidade, que dirixe, Juan Díaz Villoslada, está a piques de comezar unha serie de obras de mantemento para a mellora do estacionamento e as zonas verdes na rúa Newton, unha das arterias principais do polígono de Agrela.
Os traballos, solicitados pola Asociación de Empresarios de Agrela para reordenar unhas zonas axardinadas ocupadas indebidamente por vehículos privados que estacionan en zonas verdes, solucionarán o problema existente mediante a creación de sete novas áreas de estacionamento baixo a fórmula lousa-céspede. Ademais, manterase a zona de itinerario peonil, seguro e accesible, e tamén se proxecta a planta de árbores na contorna.
Esta intervención sumarase á xa aprobada no mes de outubro, en Xunta de Goberno Local, para a humanización e reurbanización da rúa Severo Ochoa, tamén en Agrela. A obra, incluída na estratexia DUSI e para o que se estima un investimento dun millón de euros, será financiada nun 80 % con fondos FEDER. Os traballos, cun prazo de execución de doce meses, teñen como obxectivo “a mellora ambiental de toda a zona a través de diversas accións vinculadas á creación de espazos verdes e da mellora da mobilidade”. “Trátase de humanizar, mellorar a mobilidade e reducir a contaminación ambiental e sonora desta vía”, aclarou a alcaldesa da cidade da Coruña, Inés Rey.
A inversión en Agrela durante o actual mandato
A Concellaría de Urbanismo, Vivenda, Infraestruturas e Mobilidade acometeu, desde o comezo do mandato actual, un total de oito obras nas inmediacións de Agrela. As de maior envergadura, cun investimento de 166.000 euros, foron as reparacións de pavimento MBC nas rúas Severo Ochoa, Gutenberg e Gambrinus, seguidas polos traballos para a conexión do carril-bici da estrada de Baños de Arteixo coa Sardiñeira e a rúa Cesuras, proxecto ao que se destinaron 148.456,18 euros.
Ademais, o Concello da Coruña renovou o firme da calzada na avenida Severo Ochoa (57.453,07 euros); arranxou as barreiras metálicas na ronda Real Club Deportivo (52.029,19 euros); abordou a mellora e reparación do pavimento na avenida de Fisterra (30.109,10 euros); dotou a Vioño dun aparcadoiro provisional (19.053,48 euros); afrontou os arranxos no aseo e fachadas do Centro Municipal de Empresas do Igrexario (18.144,12 euros); e, por último, acometeu a canalización e a mellora do firme no estacionamento entre o camiño do Bosque e Agrela (14.504,57 euros).
